Սաղմոս 16 — Վստահության աղոթք

1 Պահպանի՛ր ինձ, ո՛վ Աստված, որովհետև Քեզ եմ ապավինում։ 2 Տիրոջն ասացի. «Դու ես իմ Տերը, Քեզանից դուրս բարիք չունեմ»։ 3 Երկրի վրա եղող սրբերը և ազնիվները իմ ամբողջ հաճությունն են։ 4 Կշատանան նրանց ցավերը, ովքեր ուրիշ աստծու հետևից են շտապում։ Նրանց արյան ընծաները չեմ մատուցի և նրանց անունները չեմ վերցնի իմ շուրթերիս վրա։ 5 Տերն է իմ ժառանգության և իմ բաժակի բաժինը. Դու հաստատ ես պահում իմ բաժինը։ 6 Ինձ վիճակ ընկավ ցանկալի տեղանքը, և այս ժառանգությունը հաճելի է ինձ: 7 Կօրհնեմ Տիրոջը, Ով խրատում է ինձ։ Գիշերներն էլ իմ ներսը սովորեցնում է ինձ։ 8 Ես ամեն ժամանակ Տիրոջը դրեցի իմ առջև, որովհետև Նա իմ աջ կողմում է. ես չեմ սասանվի։ 9 Դրա համար իմ սիրտն ուրախացավ և իմ անձը ցնծաց։ Իմ մարմինն էլ ապահովության մեջ կբնակվի։ 10 Որովհետև Դու իմ անձը գերեզմանում չես թողնի և Քո Սրբին ապականություն տեսնել չես տա։ 11 Դու ինձ ցույց կտաս կյանքի ճանապարհը։ Քո ներկայության մեջ ուրախության լիություն կա, Քո աջ կողմը՝ քաղցրություններ հավիտյան։