Սաղմոս 12 — Աղոթք օգնության համար

1 Փրկի՛ր, Տե՛ր, որովհետև բարեպաշտը վերացավ, և հավատարիմները պակասեցին մարդկանց որդիների միջից։ 2 Յուրաքանչյուրը սուտ է խոսում իր ընկերոջ հետ։ Շողոքորթ շուրթերով և երկդիմի սրտով են խոսում։ 3 Թող Տերը կտրի բոլոր շողոքորթող շրթունքները և մեծախոս լեզուները։ 4 Նրանք ասում են. «Մենք զորավոր ենք մեր լեզուներով, մեր շրթունքները մեզ հետ են։ Ո՞վ է մեզ վրա տիրողը»։ 5 «Աղքատների կեղեքման և կարիքավորների հառաչանքի պատճառով հիմա վեր կկենամ,— ասում է Տերը,— ապահովության մեջ կդնեմ նրան, ով փափագում է»։ 6 Տիրոջ խոսքերը մաքուր խոսքեր են, ինչպես արծաթը՝ հողի բովի մեջ զտված և յոթ անգամ մաքրված։ 7 Դու, Տե՛ր, կպահես նրանց և այս սերնդից հավիտյան կպահպանես նրանց։ 8 Ամբարիշտները շրջում են ամեն կողմ, երբ մարդկանց որդիների մեջ բարձրանում են անարգները։