Սաղմոս 11 — Վստահություն Տիրոջ հանդեպ

1 Տիրոջն եմ ապավինում։ Ինչպե՞ս եք ասում իմ անձին. «Թռչնի պես փախի՛ր քո սարերը»։ 2 Որովհետև ահա ամբարիշտները լարում են աղեղը, իրենց նետերն են պատրաստում լարի վրա, որպեսզի խավարի մեջ արձակեն սրտով ուղիղների վրա։ 3 Եթե հիմքերը քանդվեն, արդարն ի՞նչ կարող է անել։ 4 Տերն Իր սուրբ տաճարում է, Տիրոջ գահը երկնքում է։ Նրա աչքերը տեսնում են, Նրա հայացքը քննում է մարդկանց որդիներին։ 5 Տերը քննում է արդարին, իսկ ամբարիշտին և բռնություն սիրողին Նրա անձն ատում է։ 6 Նա ամբարիշտների վրա որոգայթ, հուր և ծծումբ կտեղա և այրող քամի կլինի նրանց բաժակի բաժինը։ 7 Որովհետև Տերն արդար է և արդարություն է սիրում։ Ուղիղները կտեսնեն Նրա երեսը։