Եվ եթե քո աչքը գայթակղեցնում է քեզ, հանիր այն. ավելի լավ է քեզ համար մեկ աչքով մտնել Աստծո արքայություն, քան երկու աչք ունենալով գցվել գեհենի կրակի մեջ։
Աչքը հաճախ կապված է ցանկությունների, նախանձի և մարդու ներքին ձգտումների հետ։ Շատ մեղքեր սկսվում են նրանից, թե մարդը ինչի կամ ում վրա է իր հայացքը հառում։ Ուստի եթե մեր տեսողությունը, հետաքրքրությունները կամ այն, ինչին մշտապես նայում ենք, դառնում են գայթակղության աղբյուր, ապա դրանցից պետք է վճռականորեն հրաժարվել։ Տերը շարունակում է ուսուցանել, որ հոգու փրկության հարցում ոչինչ այնքան թանկ չէ, որ արժե դրա համար կորցնել Աստծո արքայությունը։ Արտաքին ամբողջականությունը ոչինչ է, եթե մարդը ներսում հեռանում է Աստծուց։ «Մեկ աչքով մտնել կյանք» նշանակում է փրկվել՝ նույնիսկ ցավալի հրաժարումներով, իսկ «երկու աչքով գնալ գեհեն » նշանակում է պահել արտաքին առավելությունները, սակայն կորցնել հավիտենական կյանքը։