Ոչ ոք չի կարող զորավոր մարդու տունը մտնելով՝ նրա ունեցվածքը կողոպտել, եթե նախ չկապի այդ զորավոր մարդուն, և դրանից հետո միայն կկողոպտի նրա տունը։
Այս խոսքն արդեն բացահայտում է Քրիստոսի առաքելության կարևոր կողմերից մեկը։ Այստեղ զորավորը սատանան է, որ այս ընկած աշխարհում մարդկանց պահում էր իր իշխանության տակ՝ մեղքի, խաբեության և մահվան միջոցով։ Սակայն Քրիստոսն ավելի զորավորն է, Ով մտնում է այդ «տունը», նախ կապում է տան զորավորին և ապա ազատում նրա գերիներին։ Հիվանդների բժշկությունը, դևերի հանումը և մեղավորների կանչը նշաններ են այն մեծ գործի, որ Քրիստոսը կատարում է՝ քանդելով սատանայի իշխանությունը։ Նա չի եկել միայն ուսուցանելու, այլ իրականում կործանելու չարի գործերը։ Այս պատկերը ցույց է տալիս, որ փրկությունը ազատագրություն է։ Մարդը միայն մեղավոր չէ, այլ նաև հաճախ գտնվում է կապանքների մեջ, որոնցից ինքն իրեն ազատել չի կարող։ Բայց Քրիստոսը եկել է որպես ավելի զորավոր Տեր, Ով հաղթում և ազատում է։